बढ्यो कोरोना संक्रमण,आज एकैदिन ९६८ संक्रमित थपिए

धादिङ,२३ पौष ।
नेपालमा कोरोना संक्रमण लगातार उकालो लाग्न थालेको छ।पछिल्लो केही दिनयता दैनिक कोरोनाबाट संक्रमित हुनेको संख्या बढेको छ।
पछिल्लो २४ घण्टामा देशभर १४ हजार ९७१ को कोरोना परिक्षणमा ९६८ संक्रमित थपिएका छन्।

यो संख्या बिहिबारको तुलनामा झण्डै चार सयले बढी हो। देशभरका प्रयोगशालाबाट ८ हजार २७२ जनाको पीसीआर गर्दा ५७२ र ६ हजार ६९९ जनाको एन्टिजेन परिक्षणमा ३९६ गरी ९६८ जनामा सङ्क्रमण पुष्टि भएको स्वास्थ्य तथा जनसङ्ख्या मन्त्रालयले जनाएको छ।

बिहिबार मात्रै ५४० संक्रमित थपिएका थिए। यो सँगै देशभर संक्रमित हुनेको संख्या ९ लाख २७ हजार ८९३ पुगेको छ ।यसैगरी पछिलो २४ घण्टामा २६२ संक्रमित डिस्चार्ज भएसँगै संक्रमित भई निको हुनेको सङ्ख्या ८ लाख १३ हजार ७०९ पुगेको छ।

संक्रमित भन्दा संक्रमणमुक्त हुने संख्या घट्दै गएपछि सक्रिय संक्रमित बढेका छन्। हाल सक्रिय संक्रमितको संख्या ५ हजार ७४१ पुगेको छ भने सङ्क्रमणमुक्त हुनेको दर ९७.९ प्रतिशत रहेको छ।

यस्तै पछिल्लो २४ घण्टामा संक्रमणका कारण कसैको पनि मृत्यु नभएको मन्त्रालयले जनाएको छ । हालसम्म सङ्क्रमणका कारण मृत्यु हुनेको संख्या एघार हजार ६०२ रहकोे मन्त्रालयको तथ्याङ्मा उल्लेख गरिएको छ।