बाल विकास सहजकर्ताका लागि क्षमता विकास तालिम

धादिङ, २१ चैत्र ।
नेत्रावती डबजोङ गाउँपालिकामा प्रारम्भिक बाल विकास सहजकर्ताका लागि क्षमता विकास तालिम सम्पन्न भएको छ । शिक्षा, युवा तथा खेलकुद शाखाको आयोजना १७ गतेदेखि २१ गतेसम्म सञ्चालन भएको तालिम आज सम्पन्न भएको हो ।

तालिम समापन समारोहका प्रमुख अतिथि बागमती प्रदेश सांसद तथा प्रमुख सचेतक गोबिन्द लम्सालले शिक्षामा अंग्रेजी माध्यमलाई मात्र प्राथमिकता नदिई नेपाली भाषाको समेत विश्वव्यापीकरण गर्नुपर्नेमा जोड दिनुभयो। उहाँले शैक्षिक गुणस्तरमा सुधार आएको बताउँदै अभिव्यक्ति कला विकासका लागि स–स्वर पढाइको महत्वबारे चर्चा गर्नुभयो ।

बालमैत्री वातावरण सिर्जना गर्न शिक्षक तथा अभिभावकहरूलाई बालबालिकाको मनोभावना बुझेर कार्य गर्न समेत लम्सालले आग्रह गर्नुभएको छ । साथै, शिक्षक तथा कर्मचारीको सेवा सुविधा र आत्मसम्मान अभिवृद्धिका लागि आफू निरन्तर लागि परेको उहाँले बताउनुभयो ।

गाउँपालिका अध्यक्ष मेघनाथ रिजालले नेपालको शिक्षा नीति आवश्यकतानुसार परिमार्जन हुन नसक्दा शैक्षिक स्तर सुधार हुन नसकेको बताउनुभयो। उहाँले शिक्षामा सुधार ल्याउन सरकारले शिक्षा ऐन ल्याउनु पर्ने भन्दै शिक्षकहरूलाई यसका लागि पहल गर्न आग्रह गर्नुभयो।
त्यस्तै गाउँपालिकाका उपाध्यक्ष सितामाया चोदेन गुरुङले मण्टेश्वरी शिक्षाको आवश्यकतामाथि जोड दिँदै निजी विद्यालयहरूले अपनाएका राम्रा अभ्यास तथा विधिहरू सरकारी विद्यालयहरूमा पनि लागू गर्नुपर्ने बताउनुभयो।

बालबालिकाको शिक्षण सिकाइमा झन्झट वा आलस्य नगरी जिम्मेवारीपूर्वक कार्य गर्न प्रमुख प्रशासकिय अधिकृत हरेराम शाहले आग्रह गर्नुभयो।

गाउँपालिकाका प्रमुख प्रशासकीय अधिकृत हरेराम शाहको अध्यक्षतामा भएको समापन सामारोहमा बाग्मती प्रदेश सांसद तथा प्रमुख सचेतक गोबिन्द लम्सालको प्रमुख आतिथ्य तथा गाउँपालिका अध्यक्ष मेघनाथ रिजाल, उपाध्यक्ष सितामाया चोदेनको विषेश आतिथ्य रहेको थियो । कार्यक्रममा गाउँपालिकाका शिक्षा अधिकृत सुशिला याङ्जो लगायतको उपस्थिति रहेको थियो।