एनएफपीजेको उपाध्यक्ष पदमा धादिङका पत्रकार सिलवालको उम्मेदवारी

धादिङ,२१ कात्तिक ।
धादिङ जिल्लामा रहेर पत्रकारिता गरिरहेका नारायण सिलवालले राष्ट्रिय फोटो पत्रकार समूह (एनएफपीजे नेपाल) को उपाध्यक्षमा उम्मेदवारि दिएका छन् । सिलवालले यहि कार्तिक २४ गते काठमाडौमा हुने राष्ट्रिय फोटो पत्रकार समूह (एनएफपीजे नेपाल) को २७ औं साधारण सभा तथा १३ औं अधिबेशनमा उपाध्यक्षमा उम्मेदवारि दिएका हुन् ।

२०६१ सालमा आँखु सन्देशबाट पत्रकारिता सुरु गरेका सिलवालले २०६४–०६९ सम्म जनमुक्तिमार्ग साप्ताहिक, २०६५–०६६ गोरखापत्र दैनिक, २०६६–०७३ रेडियो बिहानी र २०७३ देखि धादिङपोष्टको प्रधान–सम्पादकका रुपमा कार्यरत छन् ।

सिलवाल २०७३ मा राष्ट्रिय फोटो पत्रकार समूहको सदस्य बनेका थिए र २०७४ मा फोटो पत्रकार संघ धादिङको अध्यक्ष भए । जिल्ला अध्यक्षको रूपमा उनले फोटो पत्रकारिता तालिम, जिल्लास्तरीय फोटो प्रतियोगिता, पुराना फोटो पत्रकार र फोटोग्राफरलाई सम्मान र पुराना क्यामेराहरूको प्रदर्शनी जस्ता कार्यक्रमहरू सञ्चालन गरेका थिए।

सिलवाल २०७६ सालको भदौमा राष्ट्रिय फोटो पत्रकार समूह बागमती प्रदेशका अध्यक्ष बनेका थिए र २०७८ सालको पुस महिनामा पुनः बागमती प्रदेशको अध्यक्ष चयन भएका थिए। २०८० मंसिरमा भएको तेस्रो अधिवेशनबाट पनि उनी निर्विरोध अध्यक्षमा निर्वाचित भएका थिए ।

राष्ट्रिय स्तरको क्रियाशिल फोटो पत्रकारिता पुरस्कार जितिसकेका सिलवालले प्रदेश अध्यक्षको कार्यकाल नसकिँदै केन्द्रिय अधिवेशनमा उपाध्यक्ष पदको उम्मेदवारी दिएका हुन्।