धादिङमा २ हजार ९३५ पिन्ट रगत सङ्कलन

धादिङबेशी । धादिङमा आर्थिक वर्ष ०८०/०८१ मा २ हजार ९३५ पिन्ट रगत सङ्कलन गरिएको छ । जिल्लामा २०८० श्रावण १ देखी २०८१ असार मसान्तसम्म जिल्लाका बिभिन्न ४५ संघ संस्थाको आयोजनामा भएको रक्तदान कार्यक्रमबाट २ हजार ९३५ पिन्ट रगत सङ्कलन गरिएको धादिङ रेडक्रसका कोषाध्यक्ष नारायण कुमार श्रेष्ठले जानकारी दिनुभयो ।

जिल्लाको बिभिन्न स्थानमा भएको रक्तदान कार्यक्रममा ७८९ जना महिला र २ हजार १४६ जना पुरुष गरी कुल २ हजार ९३५ स्वयमसेवी रक्तदाताले रक्तदान गर्नुभएको नेपाल रेडक्रस सोसाइटी रक्त सञ्चार सेवा केन्द्र धादिङले जनाएको छ । सबै भन्दा धेरै रामकोट साकोसको आयोजनामा नीलकण्ठ नगरपालिका–८ धादिङबेशीमा भएको रक्तदान कार्यक्रममा २२६ जनाले रक्तदान गरेका थिए ।

त्यसैगरी दोस्रोमा लायन्स क्लव अफ काठमाण्डौ सुर्यमुखीले गरेको रक्तदानमा सहभागीले रक्तदान गरेका थिए । उक्त क्लवले आयोजना गरेको रक्तदानमा ११४ पुरुष र ३८ जना महिला गरि १५२ जनाले रक्तदान गरेका थिए । त्यसैगरी तेस्रोमा ईसाई समाजले १२३ र चौथोमा रोटरी क्वलले आयोजना गरिएको रक्तदानमा ११९ जनाले रक्तदान गरेका थिए ।

धादिङमा मेला, उत्सवहरुको अवसरमा नेपाल रेडक्रस सोसाईटी धादिङको सहयोगमा रक्तदान कार्यक्रम हुँदै आएको छ । धादिङमा रक्तदान कार्यक्रम आयोजना गर्ने संस्था मध्ये जिल्ला होटल महासंघको आयोजना भएको रक्तदान कार्यक्रममा सवैभन्दा कम ३ जनाले रक्तदान गरेका थिए ।