धादिङ जिल्ला खेलकुद विकास समितिको अध्यक्षको प्रताप सिंह तामाङ नियुक्त

धादिङबेशी । धादिङ जिल्ला खेलकुद विकास समितिको अध्यक्षको प्रताप सिंह तामाङ नियुक्त हुनुभएको छ । बागमती प्रदेश खेलकुद विकास समितिले तामाङलाई तेस्रो पटकको लागि अध्यक्षमा नियुक्त गरेको हो ।

वि.स.२०७६ सालदेखी धादिङ जिल्ला खेलकुद विकास समितिको अध्यक्ष प्रताप सिंह तामाङ निरन्तर रहदै आउनुभएको छ । जिल्ला अध्यक्ष हुँदा समितिको भवन निर्माण सँगै जिल्लामा खेलकुदको गतिविधि बढाएका तामाङ आफै पनि खेलाडी रहनुभएको छ । प्रदेश स्तरीय प्रतियोगतामा राम्रो नतिजा दिन सफल भएका तामाङले जिल्लाको खेलकुद क्षेत्रलाई चलायमान बनाउनु भएको छ । आगामी कार्यकालमा पनि जिल्लाको खेलकुद क्षेत्रलाई प्राथमिकतामा राखेर काम गर्ने तामाङले बताउनु भएको छ ।

हाल बागमती प्रदेश खेलकुद विकास समितिले धादिङ सहित ६ वटा जिल्लामा खेलकुद विकास समितिको अध्यक्ष नियुक्त गरेको हो ।
बागमती प्रदेश खेलकुद विकास समितिले सत्तारुढ माओवादी केन्द्रलाई चारवटा र नेकपा (एस)लाई दुईवटा जिल्ला भागबन्डा गरी अध्यक्ष नियुक्त गरिएको छ । बाँकी ७ वटा जिल्ला अब बन्ने कांग्रेस–एमाले नेतृत्वको सरकारलाई नियुक्तिका लागि छोडिएको बिशेष स्रोतले बताएको छ ।

स्रोतका अनुसार काठमाडौं र सिन्धुलीका अध्यक्ष नेकपा एसको सिफारिसमा र धादिङ सहित अन्य जिल्लाको माओवादी केन्द्रको सिफारिसमा नियुक्त भएका हुन् ।यसपटक प्रदेशले कार्यविधि संशोधन गरी जिल्ला अध्यक्षहरुको कार्यकाल चार वर्षे बनाइएको छ । अघिल्लो पटक कार्यकाल दुई वर्षे थियो ।

समितिले साढे ३ महिनादेखि रिक्त रहेको १३ वटा जिल्ला खेलकुद विकास समितिमध्ये मकवानपुर, धादिङ, काभ्रे, सिन्धुली, काठमाडौं र सिन्धुपाल्चोक गरी ६ वटामा अध्यक्ष नियुक्त गरेको हो ।