पहिरोको कारण ५ घरमा क्षती, २२ घर उच्च जोखिममा

धादिङबेशी । रुबी भ्याली गाउँपालिकाको वडा नं.४ रबास्थित गल्गडाँडा कोच्चोङ भिरमा पहिरो गएपछि ५ घरमा क्षति पुगेको छ । उक्त क्षेत्रका स्थानियहरुको भनाई अनुसार पहिरोका कारण हाल २२ घर उच्च जोखिममा रहेको छ ।

गाउँमाथिबाट अवोइ सेर्तुङतर्फ सडक लगिएको बाटो कोच्चोङ भिरमा पहिरो लडेपछि गाउँ नै जोखिममा परेको स्थानीयहरुले बताएका छन् ।
रबा क्षेत्रका एक पहिरो पीडित स्थानीयका अनुसार “सडक ट्याक भस्सिएर ठुलो पहिरोमा परिणत भएको छ । घरबार सबै छोडेर गोठको बास बिताइरहेका र बाढी पहिरो पीडितहरुलाई स्थानीय सरकारले समस्या समाधानका लागि पहल गर्नुपर्ने र राहत उपलब्ध गराउन अनुरोध गरेको उहाँले बताउनु भयो । पहिरोले सबै बाली नष्ट भएको समेत स्थानियले बताएका छन् ।

पहिरोले साङ्कोस तिप्लिङ सडक विभिन्न ठाउँमा बाटो अवरोध भएको छ । हाल धादिङ बेसीबाट खनियाबासको तरमानेसम्म सवारी चलिरहेको छ । यसबाहेक क्षेत्रमा सडक अवरुद्ध छ । पहिरो गएको स्थानमा ५ घरमा क्षति पुगेको छ । उनीहरू विस्थापित भएर नजिकै गाउँमा आश्रय लिएर बसेका छन् भने अन्य मानिसपनि घर छाडेर गोठमा बसिरहेको स्थानीयले बताएका छन् ।