सिद्धलेक पूर्ण खोप सुनिश्चितता पालिका घोषणा

धादिङबेशी । धादिङको सिद्धलेक गाउँपालिकालाई पूर्ण खोप सुनिश्चितता पालिका घोषणा गरिएको छ । जिल्ला खोप समन्वय समितिका सदस्य सचिव तथा जनस्वास्थ्य कार्यालय धादिङका निमित्त कार्यालय प्रमुख विभु कुमार झाले सोमबार गाउँपालिकालाई निश्चित इन्डिकेटरका आधारमा पूर्ण खोप सुनिश्चितता गाउँपालिका घोषणा गर्नुभएको हो ।

आर्थिक बर्ष २०८०।८१ मा गाउँपालिकाले पूर्ण खोप सुनिश्चितता निर्देशिका बमोजिम सम्पूर्ण पक्रिया पुरा गरी १६ महिना देखि २३ महिना सम्मका बालबालिकाहरुलाई १५ महिनाको उमेर भित्र पाउनुपर्ने सवै खोप पाएकोले गाउँपालिकालाई पूर्ण खोप सुनिश्चितता गाउँपालिका घोषणा हो ।

स्वास्थ्य शाखाले दिगोपना र पूर्ण खोप सुनिश्चितताका लागि चैतमा सिद्धलेक गाउँपालिकाको सवै वडामा नियमित खोपको घरभेट सर्वेक्षण गरी उमेरअनुसार खोप पाए/नपाएको यकिन गरी वडा र पालिकाको पूर्ण खोप सुनिश्चितता गरिएको सिद्धलेक गाउँपालिकाका स्वास्थ्य शाखा प्रमुख राम विनय शाहले जानकारी दिनुभयो भयो ।

पुर्ण खोप सुरक्षित भविस्य, स्थानिय श्रोतको उपयोग स्वमित्व र सहभागीता पुर्ण खोप सुनिश्चिता हाम्रो प्रतिवद्धता भन्ने नाराका साथ पूर्ण खोप सुनिश्चितता पालिका घोषणा गरिएको थियो ।

पुर्ण खोप वडा/पालिका घोषणा तथा दिगोपना सुनिश्चितता कार्यक्रमलाई सम्बोधन गर्दै जिल्ला खोप समन्वय समितिका सदस्य सचिव तथा जनस्वास्थ्य कार्यालय धादिङका निमित्त कार्यालय प्रमुख विभु कुमार झाले घोषणाकै लागि घोषणा गरेर उपलब्धी नहुने बताउँदै आफुहरुले गरेको घोषणामा पुर्ण प्रतिबद्ध रहेको र सिद्धलेक गाउँपालिका खोप नलिएको कोहिपनि बालबालिका नरहेको जानकारी दिनुभयो ।

त्यसैगरी पुर्ण खोप वडा/पालिका घोषणा तथा दिगोपना सुनिश्चितता कार्यक्रमलाई सम्बोधन गर्दै सिद्धलेक गाउँपालिकाका उपाध्यक्ष सविता अर्यालले पुर्णखोपलाई निरन्तर रुपमा सम्पन्न र सफल गर्नको लागी महिला स्वास्थ्य स्वयमसोविकाहरुको ठुलो भुमिका रहेको भन्दै धन्यवाद प्रकट गर्नुभयो । उहाँले पुर्ण खोप सुनिश्चितता गाउँपालिका घोषणा भएपनि आगामी दिनमा नयाँ जन्मेका बालबालिकाहरुको खोजी गरि पुर्ण खोप दिन दत्तचित भएर लाग्न आग्रह गर्नु भयो ।

सिद्धलेक गाउँपालिकाका उपाध्यक्ष सबिता अर्यालको अध्यक्षतामा भएको कार्यक्रममा जिल्ला खोप समन्वय समितिका सदस्य सचिव तथा जनस्वास्थ्य कार्यालय धादिङका प्रमुख विभु कुमार झाको प्रमुख आतिथ्यता रहेको थियो । कार्यक्रममा प्रमुख प्रशाशकीय अधिकृत विनोद कुमार अधिकारी,वडा अध्यक्षहरु,जनस्वास्थ्य कार्यालय धादिङका खोप अधिकृत श्याम प्रसाद पोखरेल लगाएतको आतिथ्यता रहेको थियो ।