संसदलाई जिवन्त, गतिशील बनाउनुपर्छ : पूर्व सभामुख सापकोटा

धादिङ, बैशाख २९ ।
नेकपा माओवादी केन्द्रका उपाध्यक्ष तथा पूर्व सभामुख अग्नि प्रसाद सापकोटाले संसदलाई जिवन्त, गतिशील र जनमूखी बनाउनु पर्ने बताउनुभएको छ । प्रेस सेन्टर नेपाल धादिङले शनिबार धादिङबेसीमा आयोजना गरेको पत्रकार भेटघाट कार्यक्रममा पूर्व सभामुख सापकोटाले सम्सदलाई सहमतिपूर्वक सुचारु गर्नका लागि राष्ट्रिय सहमति कार्यक्रम गरेर संचालन गर्नु पर्ने बताउनुभयो ।

उहाँले राष्ट्रिय सहमतिमा जति ढिला गर्यो देशको अस्तित्वमाथी प्रश्न चिन्ह खडा हुने बताउँदै सहमति सहकार्य र समन्वय गर्दै अघिबढ्नुपर्ने धारणा व्यक्त गर्नुभयो ।
नेकपा माओवादी केन्द्र धादिङको बैठकका लागि धादिङबेसी आइपुग्नु भएका सापकोटाले सरकारले काम गर्दा जनताको जिवनस्तर उकास्नेखालका कार्यक्रम आउन नसकेकोले आगामी दिनमा राष्ट्रको आवस्यकतामा निरन्तरतामा क्रमभंग गर्नुपर्ने बताउनुभयो ।

अहिलेको संसदले जनतालाई आशावादी बनाउन नसकेको अराजकता र उकुसमुकुसको अवस्थामा देश पुगेकोले साझा राष्ट्रिय दृष्ट्रिकोण बनाउनु पर्नेमा पार्टी उपाध्यक्ष तथा पूर्व सभामूख सापकोटाले जोडदिनुभयो ।

पत्रकारहरुको प्रश्नको जवाफ दिँदै सापकोटाले आगामी बजेटले कृषि क्षेत्रलाई सर्वाधिक महत्व दिएर नवप्रवर्धनमा जोड दिने खालको बजेट ल्याउनु पर्ने विचार व्यक्त गर्नुभयो । समाजवाद अर्थात सबैका लागि समृद्धि हुने निति कार्यक्रम र बजेट सरकारले ल्याएर देशलाई विकासको बाटोमा अघि बढाउने बताउनुभयो ।

पत्रकार भेटघाट कार्यक्रममा नेकपा माओवादी केन्द्रका केन्द्रीय सदस्य तथा धादिङ इन्चार्ज पुष्पविक्रम मल्ल, जिल्ला अध्यक्ष मनराज भण्डारी लगायतका नेताहरुको सहभागिता थियो ।