हेटौंडामा युवा सम्मेलन सुरु

बागमती प्रदेश युवा सम्मेलन हेटौंडामा सुरु भएको छ। ३ दिन चल्ने सम्मेलनको मुख्यमन्त्री शालिकराम जम्मकट्टेलले औपचारिक उद्घाटन गरेका छन। विभिन्न क्षेत्रमा रहेर काम गरिरहेका १८ देखि ३० वर्षका २ सय भन्दा बढी युवाकोे सहभागिता रहेको आयोजकले जनाएको छ।

बागमती प्रदेशको सामाजिक विकास मन्त्रालय अन्तर्गत प्रदेश युवा परिषद्ले युवा सम्मेलनको आयोजना गरेको हो।युवालाई सामाजिक र सार्वजनिक जीवनमा सहभागी गराउने, नवप्रवर्तन र उद्यमशीलता विकास गर्ने उद्देश्यले सम्मेलन आयोजना गरिएको प्रदेश युवा परिषद्का कार्यकारी उपाध्यक्ष सन्तोष चौलागाईले जानकारी दिए।

सम्मेलनमा सहभागी युवालाई नै लक्षित गरी अन्तरक्रिया, बहस, कार्यशाला, सहभागीबीच आपसी सञ्जाल निर्माण, प्रेरक सन्दर्भको व्याख्या र नेतृत्व तथा व्यक्तित्व विकाससँग सम्बन्धित क्रियाकलाप गरिने बताइएको छ ।