हिमालयन हेल्थ केयर नेपालद्धारा रुवीभ्याली गाउँपालिकालाई एम्बुलेन्स हस्तान्तरण

धादिङबेशी । धादिङको विकट गाउँपालिका भनेर चिनिने रुवीभ्याली गाउँपालिकाले आफ्नो छुट्टै एम्बुलेन्स संचालनमा ल्याएको छ । बुधबार एक कार्यक्रमको आयोजना गरी हिमालयन हेल्थकेयर नेपालले रुबीभ्याली गाउँपालिकालाई एम्बुलेन्स हस्तान्तरण गरेपछि रुवीभ्यालीमा एम्बुलेन्स सेवा संचालनमा आएको हो ।

उच्च पहाडी क्षेत्रको विकट बस्तीका नागरिक बिरामी पर्दा ओसारपसारमा सहजता ल्याउन ‘हिमालयन हेल्थ केयर नेपाल’ नामक सामाजिक संस्थाले सो गाउँपालिकालाई एम्बुलेन्स उपलब्ध गराएको हो ।

विगत ३२ वर्षदेखि रुवीभ्यालीको शिक्षा, स्वास्थ्य र आर्थिक उपार्जनको क्षेत्रमा समन्वय गर्दै आएको संस्थाले यस पटक एम्बुलेन्स सहयोग उपलब्ध गराएको छ ।रुवीभ्याली गाउँपालिकाको सम्पर्क कार्यालय धादिङबेशीमा हिमालयन हेल्थकेयर नेपालका प्रशासकिय अधिकृत कुलमणी बस्नेतले रुवी भ्याली गाउँपालिकाका उपाध्यक्ष फे लामा तामाङलाई एम्बुलेन्स हस्तान्तरण गर्नुभएको थियो ।

कार्यक्रमलाई सम्बोधन गर्नुहुँदै रुवीभ्याली गाउँपालिकाका उपाध्यक्ष फे लामा तामाङले गाउँपालिकामा नागरिकहर सामान्य बिरामी हुँदा हेलिकप्टर र्चाटर गर्नुपर्ने बाध्यताको अन्त्य भएको बताउनुभयो । किन्ताङ खोलामा बेलिब्रिज लगाएत सडक सञ्जाल बिस्तार हुँदा एम्बुलेन्स संचालनले रुवीभ्यालीबासीलाई राहत पुग्ने उपाध्यक्ष तामाङले बताउनु भयो । गाउँपालिकाले छिट्टै एम्बुलेन्स संचालन कार्यबिधि बनाएर ब्यवस्थित तवरमा एम्बुलेन्स संचालन गर्ने उहाँको भनाइ छ ।

हिमालयन हेल्थकेयर नेपालका प्रशासकिय अधिकृत कुलमणी बस्नेतले रुवी भ्याली गाउँपालिकाको अनुरोधलाई सकारात्मक रुपमा लिएर एम्बुलेन्स हस्तान्तरण गरिएको बताउनुभयो । आगामी दिनमा गाउँपालिकालाई रु १० लाख बराबरको स्वास्थ्य उपकरण सहयोग गरिने उहाँको भनाइ छ । उहाँले हस्तान्तरण गरिएको एम्बुलेन्सले स्थानीय नागरीकहरलाई सहज सेवा पुग्ने गरी गाउँपालिकाले एम्बुलेन्स संचालन गर्नेे विश्वास लिएको बस्नेतले बताउनुभयो ।

हस्तान्तरण गरिएको एम्बुलेन्स रुवीभ्याली आधारभूत अस्पतालबाट सञ्चालन हुने गाउँपालिकाकाले जनाएको छ ।