सिद्धलेकमा बालबालिकाहरुको लागि नि:शुल्क आँखा शिविर संचालन

धादिङबेशी । सिद्धलेक गाउँपालिकाले बालबालिकाहरुको लागि निशुल्क आँखा शिविर संचालन गरेको छ । गाउँपालिकाको स्वास्थ्य शाखाको आयोजना तथा दृष्टि आई केयर कलंकी काठमाडौँको समन्वयमा र सहयोगमा बालबालिकाहरुको लागि निशुल्क आँखा शिविर संचालन गरेको हो ।

गाउँपालिकाको वार्षिक कार्यक्रम अन्तरर्गत गाउँपालिका भित्र रहेका १३ वटै माध्यामिक विद्यालयमा शिविर संचालन हुने स्वास्थ्य शाखा प्रमुख राम विनय शाहले जानकारी दिनुभयो । विद्यालयमा अध्ययनरत विद्यार्थीहरुलाई आँखाको समस्याका कारण कुनै कठिनाई नहोस् भन्ने उद्देश्यले शिविर संचालन गरिएको शाहले बताउनुभयो ।

साना बच्चाहरु जथाभावि खेल्ने र आँखाको ख्याल नराख्ने हुँदा यसले भविस्यमा आँखा सम्वन्धी समस्या देखा पर्ने कुरालाई मध्यनजर गर्दै बिद्यार्थीहरुको आँखा जाँच गरिएको उहाँले नीलकण्ठ एफ.एम.लाई बताउनुभयो ।

आँखा मानव जीवनको महत्पूर्ण र संवेदनशिल अंग भएकाले पनि आँखाको हेरचाहमा सानै उमेरदेखि ध्यान दिन आवश्यक रहेको उहाँले बताउनुभयो । स्वास्थ्य शाखा प्रमुख शाहका अनुसार शिविरमा दृष्टिदोषको समस्या देखिएका विद्यार्थीहरुलाई चस्मा र आषौधी समेत निःशुल्क वितरण गरिएको छ ।

मंगलबार कालीदेवी मा.वि. आरुवासमा भएको आँखा शिविरमा २ सय जना विद्यार्थीहरुको आँखा परिक्षण गरिएको थियो । जसमध्ये १० जनालाई समस्या देखिएको छ भने ६ जना विद्यार्थीलाई चस्मा वितरण गरिएको थियो । हिजो बुधबार पन्चमुखी मा.वि मैदानमा भएको शिविरमा १८० जना विद्यार्थीको आँखा परिक्षण गरिएकोमा ६ जनालाई जस्मा वितरण गरिएको छ ।

त्यसैगरी आज बिहीबार अकलादेवी मा.वि कमलबारीमा आँखा जाँच शिविर संचालन हुने गाउँपालिकाका स्वास्थ्य शाखा प्रमुख राम विनय शाहले जानकारी दिनुभयो ।