नेकपा एमाले धादिङको अधिबेशन :आज बन्दसत्र हुँदै,सर्वसहमत नेतृत्वको प्रयास जारी

धादिङबेशी । नेकपा एमाले धादिङको नवौ जिल्ला अधिबेशन धादिङबेशीमा जारी रहेको छ । अधिबेशनको उद्घाटन शुक्रबार महासचिव शंकर पोखरेलले गर्नुभएको थियो । पुछार बजार बाट झाकी संहित खुल्ला मन्चमा पुगेर नेकपा एमाले अधिबेशनको उद्घाटनसत्र सम्पन्न गरेको छ ।

उद्घाटन सत्रमा सम्बोधन गर्नुहुँदै नेकपा एमालेका महासचिव शंकर पोखरेलले कर्याकर्ताले नेता बोक्ने नभइ पार्टी बोक्नु पर्ने बताउनुभएको छ । उहाँले कार्यकर्ताहरुले पार्टी नबोक्ने र नेता मात्र बोक्दा पार्टी सकिने भन्दै नेताहरु सच्चिन आग्रह गर्नुभयो । महासचिव पोखरेलले भन्नुभयो,‘नेताहरुले आफूलाई धुरी ठान्नु हुन्न, पार्टीलाई धुरी ठान्नु पर्छ ।’ जनताले अस्वीकार गरेकाहरुबाट सरकार संचालन गर्दा जनताले दुख पाएको बताउनुभयो । कार्यक्रमका प्रमुख अतिथि समेत रहनुभएका महासचिव पोखरेलले नेकपा एमाले चिन्नका लागि त्रिशुली नदीमाथी बनेका पुल चिने पुग्ने बताउनुभयो ।

सोहि कार्यक्रमलाई सम्बोधन गर्ने क्रममा नेकपा एमाले बागमती प्रदेश अध्यक्ष कैलाश ढुंगेलले काग्रेस र माओवादीको गठबन्धन कोदो र तोरीको जस्तो गठबन्धन भएको बताउनु भएको थियो ।

एमाले धादिङका अध्यक्ष भूमि त्रिपाठीको अध्यक्षतामा भएको कार्यक्रममा नेकपा एमाले नेता र कार्यकर्ताहरुको भव्य सहभागिता रहेको उद्घाटन समारोहमा नेकपा एमाले केन्द्रीय सदस्य तथा धादिङका इन्चार्ज धर्मदत्त देबकोटा, नेपाली काँग्रेस जिल्ला सभापति रामनाथ अधिकारी, नेकपा माओवादी केन्द्रका जिल्ला संयोजक मनराज भण्डारी लगायतले शुभकामना व्यक्त गर्नुभएको थियो ।

आज हुने बन्दसत्र बाट सर्वसहमत नेतृत्व चयनको लागी छलफल जारी रहेको नेकपा एमाले धादिङले जनाएको छ ।