ज्वालामुखीको दरथोक, सेखाम, धारापानी टोल नमुना सफा तथा स्वच्छ गाउँ घोषणा

ज्वालामुखी गाउँपालिकाको वडा नम्बर १ स्थित ३ टोललाई नमुना सफा तथा स्वच्छ गाउँ घोषणा गरीएको छ । शनिबार एक कार्यक्रमकाबिच गाउँपालिकाका अध्यक्ष यमनाद दनैले दरथोक, से खाम, धारापानी टोललाई नमुना सफा तथा स्वच्छ गाउँ घोषणा गर्नुभएको हो । ज्वालामुखी गाउँपालिका वडा नम्बर १ को आयोजना तथा ज्वालामुखी गाउँपालिका र शान्ति नेपालको सहयोगमा ३ टोलहरुलाई नमुना सफा तथा स्वच्छ गाउँ घोषणा गरिएको हो । नमुना सफा र स्वच्छ गाउँ घोषणा गरिएको दरथोक, से खाम, धारापानी टोलमा २१९ घरधुरी रहेको छ ।

नेपाल सरकारको पुर्ण सरसफाइ मार्गदर्शन २०७३ अनुसार सफा र स्वच्छ टोल घोषणा हुनको लागि आवश्यक पर्ने सवै सुचकहरु पुरा गरेकाले उक्त टोलहरुलाई पुर्ण सरसफाइ युक्त स्वच्छ र सफा गाउँ घोषणा गरिएको ज्वालामुखी गाउँपालिकाका स्वास्थ्य संयोजक सुजन श्रेष्ठले जानकारी दिनुभयो। पुर्ण सरसफाइ मार्गदर्शन २०७३ ले ५ वटा ब्यवहारहरु नियमित रुपमा चर्पीको उचित प्रयोग, ब्यक्तिगत सरसफाइ, सुरक्षित खानेपानी, सुरक्षित र स्वच्छ खाना, घर तथा आँगनको सरफाइका १५ वटा सुचकहरु पुरा गरेमा पूर्ण सरसफाईयुक्त गाउँ भन्न मिल्ने श्रेष्ठले बताउनुभयो ।

गाउँपालिकाका अध्यक्ष यमनाथ दनैले २०८२ सालसम्म ज्वालामुखी गाउँपालिकालाई नमुना, सफा तथा स्वच्छ गाउँ घोषणा गर्ने लक्ष्यका साथ काम भइरहेको बताउनुभएको छ । ज्वालामुखी गाउँपालिका वडा नं १ का वडा अध्यक्ष कृष्ण गिरीको अध्यक्षतामा भएको कार्यक्रममा गाउँ पालिकाका अध्यक्ष यमनाथ दनैको प्रमुख आतिथ्यता रहेको थियो । गाउँपालिकाका उपाध्यक्ष धर्म बहादुर अर्यालको विशेष आतिथ्यता रहेको कार्यक्रममा स्वास्थ्य शाखा प्रमुख सुजन श्रेष्ठ, शान्ति नेपालका परियोजना संयोजक इन्द्रमान शाक्य लगायतको आतिथ्य रहेको थियो । ज्वालामुखी गाउँपालिको यसअघि वडा नं ३ को मिलिजुली टोल र सन्यासी टोल, वडा नं ५ को दुई घरे भदुवार र खाली गाउँ, वडा नं ७ को धारा पानी, डाँडा थोक, थापा थोक र कोट थोक गाउँलार्ई नमुना, सफा तथा स्वच्छ गाउँ घोषणा गरेको थियो ।