गंगाजमुनाको रिगाउँ पहिरोको जोखिममा, घर खालि गरिदै

धादिङको उत्तरी क्षेत्रमा पर्ने गंगाजमुना गाउँपालिका–१ स्थित रिगाउँ पहिराको जोखिममा परेको छ । बस्ती माथिबाट भासिएर पहिरो झर्ने खतरा बढेपछि रिगाउँका ६३ घर जोखिममा परेका हुन् ।

अहिले भासिन थालेको स्थानभन्दा तलका घर खालि गरेर सुरक्षित स्थानतर्फ सारिरहेको गाउँपालिकाका विपद व्यावस्थापन संयोजक तथा वडा नं ३ का वडा अध्यक्ष राज कुमार गुरुङले बताउनुभयो ।

गाउँभन्दा माथिका जमिन भासिन थालेको छ । त्यही भासिन थालेको ठाउँभन्दा मुनि बस्ती छ । करिब ६३ घरजति पुरिने अवस्थामा पुगेको गुरुङले बताउनुभयो ।

हिजोदेखि लगातार पानी परिरहेको र बिहान स्थानीयवासी घाँस काट्न जाने क्रममा जमिन भासिएको देखेर गाउँमा खबर गरेका थिए । सरोकारवाला सबैले गएर गएर हेर्दा थप जोखिम हुने सक्ने भएकाले बस्ती खाली गर्न सुरु गरिएको विपद व्यावस्थापन संयोजक गुरुङको भनाइ छ ।