धादिङ जिल्लामा आत्महत्या गर्नेको संख्या बढ्यो,गत आर्थिक बर्षमा मात्र ११२ जनाले गरे आत्महत्या

धादिङ । धादिङ जिल्लामा आत्महत्या गर्नेको संख्या बढेको छ । जिल्ला प्रहरी कार्यालय धादिङले प्रस्तुत गरेको बार्षिक प्रतिवेदन अनुसार धादिङ जिल्लामा आत्महत्या गर्नेको संख्या बढेको पाईएको हो ।

आर्थिक बर्ष २०७९/०८० मा धादिङ जिल्लामा १ सय १२ जनाले आत्महत्या गरेका छन् । बागमती प्रदेशका १३ जिल्ला मध्ये आत्महत्या गर्ने जिल्लामा धादिङ एक नम्बरमा रहेको जिल्ला प्रहरी कार्यालय धादिङका प्रमुख गौतम मिश्रले बताउनु भयो । गत आर्थिक बर्षमा जिल्लामा ९७ जनाले आत्महत्या गरेका थिए । जिल्लामा आत्महत्या गर्नेको संख्या बढीरहेको भएपनि त्यसको न्युनीकरणको लागि स्थानीय तहले खासै चासो देखाएका देखिदैन ।

प्रहरीले सार्वजनिक गरेको बार्षिक प्रतिवेदन अनुसार अपराधका घट्नाहरु पनि बढेको देखिएको छ । यसैगरी राजस्व संकलनमा बृद्धि भएको छ भने सडक दुर्घटनामा  न्युनीकरण भएको पाईएको छ । गत आर्थिक बर्षमा घरेलु हिंसाका ६५ वटा घट्ना भएका छन् भने जसमा ५४ वटा फछ्यौट भएको छ ।

फरार अभियुक्त १ सय १० जनालाई प्रक्राउ गरीएको जिल्ला प्रहरी कार्यालय धादिङले जनाएको छ । समुदाय प्रहरी साझेदारी कार्यक्रम अन्तरगत ७ सय १६ वटा कार्यक्रमहरु सम्पन्न भएका छन् ।