धादिङबेशी आसपासका खोलानालामा सरसफाई अभियान

धादिङ । धादिङबेशी आसपासका खोलानालामा सरसफाई अभियान संचालन गरिएको छ । नीलकण्ठ नगरपालिकाको आयोजनामा नगर प्रहरी, नेपाल प्रहरी, टोल सुधार समिति, निर्वाचित जनप्रतिनिधि तथा कर्मचारीहरुको समुहले प्रत्येक शनिबार थोपल खोला तथा अरुङखोला आसपासमा सरसफाई अभियान संचालन गरेको हो ।

धादिङ जिल्लाको मुटु भनेर चिनिने नीलकण्ठ नगरपालिकालाई फोहोर मुक्त नगर बनाउने उदेश्यका साथ अभियान कै रुपमा सरसफाई कार्यक्रम संचालन गरिएको टोल सुधार महासमितिका अध्यक्ष नर बहादुर श्रेष्ठले बताउनुभयो । बर्खायाम सुरु भए संगै डेगु लगाएतका संक्रामक रोग बढ्ने खतरालाई समेत मध्यनजर गर्दै सरसफाई अभियान संचालन गरेकोे नीलकण्ठ नगरपालिकाका स्वास्थ्य शाखा प्रमुख बिष्णु प्रसाद रिजालले बताउनुभयो । नगरबासीले थप सहभागीता जनाई यो अभियानलाई सार्थकता दिनुपर्ने उहाँको भनाई छ ।

पहिलो चरणमा थोपलखोलामा सरसफाईमा कार्यक्रम गरी अहिले अरुङखोलामा अभियान जारी रहेको छ । घरबाट निस्केको फोहोरहरु खोलानालामा नफाल्न र फोहोर बाक्ने गाडी नआईकन घरबाहिर फोहोर नराख्न नगर प्रहरी प्रमुख तेज बहादुर लामिछाने बजारबासीलाई आग्रह गर्नु भएको छ ।