जथाभावी फोहोर फालिने स्थानमा नगरपालिकाले सिसि क्यामेरा राख्ने,(यस्तो छ,आजको निर्णयहरु)

धादिङ,२० बैशाख
धादिङको नीलकण्ठ नगरपालिकाले फोहोर फालिने सम्भावित स्थानमा सिसि क्यामेरा राख्ने निर्णय गरेको छ ।खोलाको क्षेत्र लगायत अन्य स्थानमा जथाभावी फोहोर फाल्दा खोलामा प्रदुषण बढेको र खोला तथा बजार क्षेत्रमा फोहोर बढेको भन्दै जथाभावी फोहोर फाल्नेको पहिचान गर्नको लागि नगरपालिकाले सिसि क्यामेरा राख्न लागेको हो ।

नगरपालिकाले नियमित फोहोर उठाउदै आएपनि अझै पनि नगरबासीहरुले फोहोरलाई सहि स्थानमा नराखी जथाभावी फोहोर फाल्ने गरेकोले सिसि क्यामेरा राख्ने निर्णय भएको हो ।जथाभावी फोहोर फाल्नेलाई नगरपालिकाले सजाय गर्ने र त्यसको निर्णय बैशाख ३१ गते बस्ने कार्यपालिकाको बैठकले गर्ने नगरपालिकाका प्रशासन शाखा प्रमुख तथा सुचना अधिकारी लोकनाथ उपाध्यले जानकारी दिनुभयो ।

बैठकले धादिङबेसी बजार क्षेत्रलाई सफा र हराभरा बनाउने उदेश्यले साप्ताहिक रुपमा सरसफाई अभियान गर्ने समेत निर्णय भएको छ । त्यसको लागि स्थानीय नागरिकहरुको सहभागिता अनिवार्य गराउने समेत निर्णय भएको छ ।नीलकण्ठ नगरपालिकाको नेतृत्वमा नीलकण्ठ नगरपालिकाको नदी किनार तथा मठ मन्दिर लगायतका सार्वजनिक स्थलहरुको सरसफाई गर्न सरोकारवाला निकायसँग समन्वय गरी साप्ताहिक रुपमा कार्यक्रम सन्चालन गरिने भएको हो।

सरसफाई कार्यक्रमको नियमितता तथा निरन्तरताको लागि टोल विकास संस्था/टोलबासीहरुलाई अभिमुखीकरण गर्ने कार्यका लागि वडा कार्यालयको सहकार्यमा टोल सुधार महासंघलाई जिम्मेवारी तोक्ने समेत बैठकले निर्णय गरेको छ ।आफ्नो टोल सफा सुग्घर र व्यवस्थित राख्ने टोल विकास संस्थाहरुमध्ये बाट उदाहरणीय उत्कृष्ट काम गर्ने टोल विकास संस्था छनोट गरी सम्मान तथा पुरस्कार प्रदान गर्ने समेत निर्णय भएको हो ।

बैठकले खोला किनार तथा सार्वजनिक स्थल सफाई कार्यक्रमको सुरुवात यहि बैशाख २२ गते बिहान ७ बजे धादिङबेसी पुछार बजारको बसर्पाक क्षेत्र तथा सो भन्दा तलको खोला किनारा सरसफाई गर्ने,धादिङबेसी बजार क्षेत्रको किनारको फुल गमला संरक्षण तथा गोडमेल हेरचाहको लागि सम्बन्धित क्षेत्रको टोल विकास समिति मार्फत फुल गमला रहेको स्थलसँगै जोडिएको घर जग्गा धनीलाई अनुरोध गर्ने समेत बैठकले निर्णय गरेको छ ।
बैठकमा नीलकण्ठ नगरपालिकाका मेयर भीम प्रसाद ढुंगाना,उप मेयर दिपक विश्वकर्मा,प्रमुख प्रशासकीय अधिकृत पुरुषोत्तम सुवेदी, सशस्त्र प्रहरी बल बेश क्याम धादिङका जीवन भट्टराई,जिल्ला प्रहरी कार्यालय धादिङका सन्तुलाल प्रसाद जैसवाल,शिवदल गण गजुरीका सह सेनानी नेल्सन बस्नेत,वडा अध्यक्षहरु,शाखा प्रमुखहरु,कार्यपालिका सदस्य,धादिङ उद्योग वाणिज्य संघ,नेपाल घरेलु तथा साना उद्योग महासंघ,धादिङ चेम्बर्स अफ कर्मसका प्रमुख तथा सरोकारवाला निकायका प्रमुख एवंम प्रतिनिधिहरुको सहभागिता रहेको थियो ।