नीलकण्ठ नगरपालिकाको दोश्रो नगरसभाको दोश्रो अधिवेशन सम्पन्न(फोटो फिचर)

धादिङ,२२ फागुन
धादिङको नीलकण्ठ नगरपालिकाको दोश्रो नगरसभा एवम् दोश्रो अधिवेशन सम्पन्न गरेको छ । हिउँदे सभाको रुपमा लिइएको यो नगरसभाले संशोधित बजेट, कानुन, ऐन नियम र कार्यविधिहरु स्वीकृत गर्दै सम्पन्न भएको हो ।गत असारको नगरसभाबाट वार्षिक नीति, कार्यक्रम तथा बजेट पारित गरेको नगरपालिकाले हिउँदे अधिवेशनबाट केहि योजनाहरु संशोधन गरेको छ । विभिन्न शिर्षकबाट रकमान्तर गरी केही अत्यावश्यक तथा छुट हुन गएका योजनाहरुमा बजेट विनियोजन गरिएको छ ।

नगरप्रमुख भीमप्रसाद ढुंगानाले नीति तथा कार्यक्रमको समिक्षा प्रतिवेदन प्रस्तुत गनुभएको थियो।उहाँले आगामी ५ वर्षभित्र देश कै नमुना पूर्वाधारयुक्त पर्यटकीय नगरको रुपमा नीलकण्ठ नगरपालिकाको विकासको गति अघि बढाइरहेको जानकारी दिनुभयो।नगरसभामा नगरप्रमुख ढुंगानाले पारदर्शी, जनउत्तरदायी र समृद्ध नगर निर्माणका लागि प्रतिबद्ध रहेको बताउनुभयो ।प्रमुख ढुंगानाले इमान्दारिता र आर्थिक पारदर्शीका आधारमा काम अघि बढाइएको भन्दै सबै पक्षको सकारात्मक सहयोगको अपेक्षा गरेको बताउनुभयो ।

युवाहरुलाई स्वरोजगार बनाउने उद्धेश्यले मेयर उद्यमशीलता कार्यक्रम संचालन गरिरहेको भन्दै नागरिकहरुको अपेक्षा अनुसार काम भइरहेको बताउनुभयो ।नीलकण्ठ नगरपालिकाले आर्थिक वर्ष २०७९/०८० का लागि १ अर्व ४९ करोड ८२ लाख २९ हजार २ सय ५५ रुपैयाँ संसोधित बजेट सार्वजनिक गरेको छ।दोस्रो नगरसभाको दोस्रो अधिवेशनमा उपप्रमुख दिपक विश्वकर्माले संसोधित बजेट चालुतर्फ ८७ करोड ७१ लाख २५ हजार ९ सय ९१ र पुँजिगततर्फ ६२ करोड ११ लाख ३ हजार २ सय ६४ रुपियाँ विनियोजन गरेको बताउनुभयो ।
पूर्व स्वीकृत वजेट चालुतर्फ ८५ करोड ६ लाख ५५ हजार ९ सय ९१ र पुँजीगततर्फ ६३ करोड २ लाख ३ हजार २ सय ६४ रुपियाँ गरी कुल १ अर्व ४८ करोड ८ लाख ५९ हजार २ सय ५५ रहेको थियो ।चालु आर्थिक वर्षको बजेट १ करोड ७३ हजार ७० लाख रुपैँयाले बृद्धि हुन आउने उपप्रमुख विश्वकर्माले बताउनुभयो।

समृद्ध नीलकण्ठ नगरको आधारः कृषि, पर्यटन उद्यमशीलता सहितको पूर्वाधार भन्ने नाराको साथ सम्पन्न भएको नगरसभामा नगरउपप्रमुख दिपक विश्वकर्माले आर्थिक वर्ष २०७९/०८० को संशोधित बजेट कार्यक्रम सहितको विनियोजन ऐन २०७९ र आर्थिक ऐन, २०७९ लाई प्रस्तुत गर्नुभएको भएको थियो ।त्यसैगरि सामाजिक सुरक्षा तर्फ २५ करोड ९ लाख २८ हजार बजेट निकासा भएकोमा १४ करोड ३ लाख ६३ हजार ३ सय ६८ खर्च भएको छ ।चालु आर्थिक वर्ष २०७८/०८० को माघ मसान्तसम्मको प्रगति/मुख्य उपलब्धीहरुको समिक्षा गरी सभाबाट पारित गरिएको छ।

नगरबासीको गुनासो नआउनेगरी कर्मचारी र जनप्रतिनिधिले काम गर्ने भन्दै नगर उपप्रमुख विश्वकर्माले विकासमा एकमत भएर अघि बढीरहेको बताउनुभयो।नगरसभामा उत्कृष्ट कर्मचारीबाट प्रशासन शाखा प्रमुख लोकनाथ उपाध्यय ,प्राविधिक प्रमुख इन्जिनियर तर्फ विशाल कँडेल र नगरपालिकाको लोगो डिजाइन गर्ने नीलकण्ठ वडा नं.३ का प्रेम कुमार श्रेष्ठलाई नगद सहित सम्मान गरिएको छ ।