सुनगाभा एकेडेमीमा फुड फेस्टिबल तथा नृत्य प्रतियोगिताको दोस्रो संस्करण सम्पन्न

धादिङ,५ फागुन ।
धादिङबेशीमा रहेको जिल्लाकै पहिलो निजी विद्यालय सुनगाभा एकेडेमीमा फुड फेस्टिबल तथा नृत्य प्रतियोगिताको दोस्रो संस्करण आज सम्पन्न भएको छ । विद्यालयका प्रधानाध्यपक बद्री लम्सालको अध्यक्षतामा सम्पन्न भएको कार्यक्रममा विद्यालयका प्रबन्धक संचालक रामहरी अधिकारीको प्रमुख आतिथ्यता रहेको थियो ।

विद्यालयको अतिरिक्त क्रियाकलाप अन्तर्गत विद्यार्थीहरुको पुर्व व्यवसायीक सिप र क्षमता विकास गर्ने उद्धेश्यले आयोजना गरिएको उक्त फुड फेस्टिबल कार्यक्रममा विद्यार्थीहरु आफैले विभिन्न परिकारहरु बनाई त्यसको विक्रि वितरण समेत गरेका थिए । त्यसैगरी ३ समुहमा भएको नृत्य प्रतियोगितामा पहिलो समुह अन्तर्गत कक्षा यु.के.जी, १ र २ बाट कक्षा यु.के.जी उत्कृष्ट हुन सफल भएको छ ।

त्यसैगरी दोस्रो समुह अन्तर्गत कक्षा ३, ४ र ५ बाट कक्षा ५ र तेस्रो समुह अन्तर्गत कक्षा ६, ७ र ८ बाट कक्षा ७ उत्कृष्ट हुन सफल भएको थियोे।नृत्य प्रतियोगितामा विजेता विद्यार्थीहरु र कक्षा शिक्षकलाई मेडल, प्रमाण पत्र र ट्रफी बाट सम्मान गरिएको थियो।उक्त नृत्य प्रतियोगिताको निर्णायक मण्डलमा मित्र तामाङ र अस्मि गुरुङ रहनुभएको थियो भने नृत्य प्रतियोगिताको कोरियोग्राफी विद्यालयकी नृत्य शिक्षिका मन्जु तामाङले गर्नुभएको थियो ।

कार्यक्रमलाई सम्बोधन गर्नुहुदै विद्यालयका प्रबन्ध संचालक रामहरी अधिकारीले विद्यालय सिप, संस्कार र प्रविधिलाई प्रयोग गर्दै अगाडि बढ्ने र विद्यार्थीहरुको उच्च शिक्षा हासिल गर्ने एक गन्तव्यको रुपमा सुनगाभा एकेडेमी सदैब लागि पर्ने कुरा व्यक्त गर्नुभयो।

जिल्लामा नै पहिलो पटक नृत्य विधालाई पाठ्यक्रममा समावेश गरी सुनगाभा एकेडेमीले नृत्य कक्षा संचालन गरिरहेको विद्यालयका प्रधानाध्यपक बद्री लम्सालले बताउनुभयो । विद्यालयको अतिरिक्त क्रियाकलाप संयोजक सन्तोष मगरले फुड फेस्टिबल तथा नृत्य प्रतियोगिता संचालन गर्नुभएको थियो भने सहायक प्रधानाध्यापक गोकर्ण अधिकारीले स्वागत मन्तव्य राख्नुभएको थियो ।