व्यक्तिगत सहयोग गर्दै अध्यक्ष परशुराम खतिवडाः चालु आबमा २ लाख भन्दा बढी सहयोग

धादिङ,२३ माघ ।
धादिङको सिद्धलेक गाउँपालिकाका अध्यक्ष परशुराम खतिवडाले चालु आर्थिक बर्षको ६ महिनामा २ लाख ७ हजार १ सय ५ रुपैँया सहयोग गर्नुभएको छ। व्यक्तिगत तबरबाट आफ्नो पालिका र जिल्लाका विभिन्न स्थानमा नगद सहयोग गर्नुभएको हो ।आफ्नो व्यापार व्यावसायबाट आएको रकम मध्ये केहि अंश सामाजिक सेवामा लगानी गर्ने गरेको अध्यक्ष परशुराम खतिवडाले बताउनु भएको छ ।

पालिका अध्यक्ष नहुँदा पनि विगत देखीनै सामाजिक काम गर्दै आईरहेको भन्दै खतिवडाले अहिले पनि उक्त कामलाई निरन्तरता दिईरहेको बताउनुभयो । विगतमा खानेपानी,स्वास्थ्य,आमा समुहको भवन निर्माण,मठमन्दिर निर्माण,खेलकुदको क्षेत्रमा सहयोग गर्दै आईरहनुभएको छ।

यस चालु आर्थिक बर्षमा पालिकाको अमर आर्दश माविलाई नगद १५ हजार र सरस्वती मन्दिर निर्माणको लागि नगद २० हजार सहयोग गर्नुभएको छ ।यसैगरी परेवाटारमा विश्व भागवत धाम निर्माणको लागि १ लाख १ हजार १ सय ५ रुपैँया सहयोग गर्नुभएको खतिवडाले बताउनु भएको छ ।

यसैगरी सल्यानटारमा रहेको नरसिंह धाम विकास संरक्षण मुल समितिलाई नगद ५१ हजार र पालिका भित्रको एक गरिब परिवारलाई लत्ताकपडा र खाद्यन्न गरि ३० हजार बराबरको सहयोग गर्नुभएको नीजि सचिवालयले जानकारी दिएको छ ।