धादिङ–पोखरा सम्पर्क समाजद्धारा नीलकण्ठको सामरी भज्याङ माविमा अक्षयकोष स्थापना

धादिङ,१६ मंसिर 
धादिङ–पोखरा सम्पर्क समाजले धादिङको नीलकण्ठ नगरपालिका वडा नम्बर ९ स्थित सामरी भज्याङ माध्यमिक विद्यालयमा अक्षयकोष स्थापना गरेको छ । गरिब,जेहेन्दार तथा विपन्न वर्गका विद्यार्थीहरुलाई पठन पाठन गर्न सहजहोस भनेर अक्षय कोषको स्थापना गरिएको धादिङ–पोखरा सम्पर्क समाजका अध्यक्ष गोकर्ण लम्सालले जानकारी दिनुभयो।

विद्यालयमा अध्ययनरत जेहेन्दार विद्यार्थीलाई छात्रवृत्ति प्रदान गर्ने उद्देश्यले समाजले ३ लाख ११ हजार १ सय ११ रुपैँयाको अक्षयकोष स्थापना गरिएको हो।शुक्रबार एक कार्यक्रमका बिच नीलकण्ठ नगरपालिकाका मेयर भीम प्रसाद ढुंगानाले विद्यालयलाई चेक हस्तान्तरण गर्नुभएको हो।धादिङ–पोखरा सम्पर्क समाजका अध्यक्ष गोकर्ण लम्सालको अध्यक्षतामा सम्पन्न भएको कार्यक्रममा नीलकण्ठ नगरपालिकाका मेयर भीम प्रसाद ढुंगानाको प्रमुख आतिथ्य रहेको थियो ।

नीलकण्ठ नगरपालिकाका प्रमुख प्रशासकीय अधिकृत दिनेशराज पन्तको विशेष आतिथ्य रहेको कार्यक्रममा वडा नम्बर ९ का वडा अध्यक्ष राजन बराईली,वडा नम्बर १०का वडा अध्यक्ष सरोज पाण्डे,नगरपालिकाका सल्लाहाकार दिपक कोईराला,कार्यपालिका सदस्यहरु चिनामायाँ श्रेष्ठ,राम्री नेपाली,समाजका सचिव टिका बहादुर लम्साल लगायत समाजका पदाधिकारीहरुको आतिथ्यता रहेको थियो।

कार्यक्रमका प्रमुख अतिथी मेयर ढुंगानाले धादिङ–पोखरा सम्पर्क समाजले राखेको अक्षयकोषमा नगरपालिकाको तर्फबाट केहि रकम थप गरिदिने बताउनुभयो ।नीलकण्ठ नगरपालिकामा आएर अक्षय कोष स्थापना गरेको भन्दै समाजलाई मेयर ढुंगानाले धन्यवाद दिनुभयो । धादिङबाट पोखरा गई विभिन्न पेशा तथा व्यवसाय गरेर पनि जिल्लावासीको हितका लागि महत्वपूर्ण काम गरेको भन्दै मेयर ढूंगानाले धन्यावद दिनुभएको छ।

आफु दोस्रो पटक नीलकण्ठ नगरपालिकाको मेयरमा निर्वाििचत भएको भन्दै उहाँले अबको पाँच बर्ष नगरपालिकाको विकासमा अर्जुन दृष्टि लगाएर काम गर्ने बताउनुभयो । नगरको विकास गर्नको लागि श्रोत जुटाउनको लागि आफु जिल्ला बाहिर बढी हिड्नुपरेको भन्दै उहाँले कुनै समस्या भए आफुलाई फोन गर्नको लागि आग्रह गर्नुभयो।

आफुले स्थापना गर्नको लागि सहयोग गरेको विद्यालयको विकासको लागि आफु प्रतिबद्ध रहेको समेत बताउनुभयो।अघिल्ला वर्षमा राहत र शैक्षिक सामाग्री वितरण गर्दै आइरहेकोमा पछिल्ला केही वर्षदेखि अक्षयकोष स्थापना गरेर अघि बढेको समाजका अध्यक्ष गोकर्ण लम्सालले जानकारी दिनुभयो।समाजले यसअघि धादिङको त्रिपुरासुन्दरी गाउँपालिकास्थित भीमोदय मावि,ज्वालामुखी गाउँपालिकास्थित ज्ञानज्योति स्कूल र गजुरी गाउँपालिकास्थित गजुरी पीडा मावि,सिद्धलेकको कालिकादेवीमा अक्षयकोष स्थापना भएको समाजका अध्यक्ष गोकर्ण लम्सालले जानकारी दिनुभयो।