देशभर जम्मा ८ जनामा कोरोना संक्रमण पुष्टि, सक्रिय संक्रमित १७ सय ५८

धादिङ,१२ चैत्र ।
नेपालमा थप ८ जनामा कोरोना भाइरसको सङ्क्रमण पुष्टि भएको छ । गत २४ घन्टामा देशभर २ हजार ६५५ कोरोना परीक्षण गर्दा जम्मा ८ जनामा सङ्क्रमण पुष्टि भएको स्वास्थ्य तथा जनसङ्ख्या मन्त्रालयले जनाएको छ ।

देशभर १ हजार ६९६ आरटी पिसिआर परीक्षणमा ८ जनामा संक्रमण पुष्टि भएको छ भने ९ सय ५९ एन्टिजेन परीक्षण गर्दा संक्रमण पुष्टि भएको छैन ।

यस्तै गत २४ घन्टामा देशभर रहेका सक्रिय सङ्क्रमित मध्ये २ सय १० जना स्वस्थ भएका छन् भने संक्रमणका कारण मृत्यु हुने शुन्य रहेको छ।

योसँगै नेपालमा हालसम्म कोरोना सङ्क्रमण पछि निको हुनेको सङ्ख्या ९ लाख ६४ हजार ६०८ पुगेको छ भने ११ हजार ९ सय ५१ जनाको मृत्यु भएको छ । अब देशभर सक्रिय सङ्क्रमितको सङ्ख्या १ हजार ७५८ रहेको छ।

देशभर आजसम्म ११ लाख १८ हजार ४२२ कोभिड संक्रमित भएको मन्त्रालयद्धारा सार्वजनिक अद्यावधिक तथ्याङ्कमा उल्लेख गरिएको छ।