एक महिनामा सात किलो सुन बरामद

काठमाडौं, फागुन १३ ।

अवैध रूपमा नेपाल ल्याउँदै गरेको करिब पाँच किलो सुनसहित गत माघ २९ गते एक चिनिया नागरिकलाई त्रिभुवन अन्तर्राष्ट्रिय विमानस्थलबाट प्रहरीले पक्राउ गर्‍यो।

यस्तै माघ १९ गते अवैध सुन र मोबाइलसहित तीनजनालाई प्रहरीले पक्राउ गरेको थियो। हिमालय एयरको विमानमा दुबईबाट काठमाडौं आएका रौतहट गौरका ३२ वर्षीय सुनीलकुमार साह, मकवानपुरको मनहरीका २८ वर्षीय नवराज परियार र सिन्धुपाल्चोकको भोटेकोसीका ३९ वर्षीय दावा छिरिङ शेर्पालाई प्रहरीले पक्राउ गरेको थियो। उनीहरूको साथबाट अवैध एक किलो १२५ ग्राम सुन र आइफोन १३ प्रो म्याक्स ५ थान फेला बरामद गरियो।

अन्तर्राष्ट्रिय विमानस्थल सुरक्षा कार्यालयले एक महिनाको अवधिमा साढे ७ किलो अवैध सुन बरामद गरेको छ। गत माघ १९ गतेदेखि फागुन ९ गतेसम्म दुई विदेशीसहित ११ जनाको साथबाट ७ किलो २३० ग्राम अवैध सुन बरामद गरिएको विमानस्थल सुरक्षा कार्यालयका प्रमुख एसएसपी भिमप्रसाद ढकालले जानकारी दिए। उनका अनुसार विभिन्न देशबाट अवैध सुन ल्याएको अवस्थामा ९ जना नेपाली तथा एक/एक जना बंगलादेशी र चिनिया नागरिकलाई पक्राउ गरिएको छ।

अवैध रूपमा नेपाल ल्याइएको सुनको अहिलेको बजार मूल्य करिब ५ करोड ९० लाख रूपैयाँ बराबरको रहेको एसएसपी ढकालले बताए। त्यस्तै, २५ हजार १५१ अमेरिकी डलर, ४७ हजार ७६० साउदी रियाल, २ हजार ६७५ युएई दिराम, २ हजार २२० भारु, ५० जर्जिया लारी, ५ वेलायती पाउन्ड र ४१।५ ओमानी रियल बरामद गरिएको एसएसपी ढकालले बताए। प्रहरीले आइफोन ५ थान, अन्य विभिन्न कम्पनीका मोबाइल ९ थान, ल्यापटप ३ थानका साथै ३३ सय ६४ किलो सुर्तीजन्य पदार्थ नष्ट गरिएको र ५ सय २९ किलो बरामद गरेर नष्ट गर्न बाँकी रहेको बताइएको छ।
नागरिक दैनिकबाट