पन्ध्र किलोमा टिपर र भ्यान ठोक्किँदा धादिङका दुई जनाको मृत्यु,दुई घाईते

धादिङ, २१ माघ।
नारायणगढ–मुग्लिन सडकखण्ड स्थित पन्ध्र किलोमा टिपरमा भ्यान ठोक्किँदा दुई जनाको मृत्यु भएको छ भने दुईजना घाईते भएका छन्।

मुग्लिनबाट भरतपुरतर्फ आउँदै गरेको बा ११ च ५७८८ नम्बरको मारुती भ्यान विपरित दिशाबाट गइरहेको लु २ ख १७०१ नम्बरको टिपरमा शुक्रबार बिहान करिब ८ः२० बजेको समयमा ठोक्किँदा भ्यानमा सवार दुई जनाको मृत्यु भएको जिल्ला प्रहरी कार्यालय चितवनका प्रवक्ता नरहरि अधिकारीले जानकारी दिनुभयो।

मृत्यु हुनेमा धादिङको गल्छी गाउँपालिका–१ की निशा वली ढुंगाना र उनका नौ वर्षीय छोरा निमेश ढुंगाना रहेका छन्।

निमेशको उपचारका लागि भरतपुरतर्फ लैजाँदै गर्दा बाटोमै मृत्यु भएको हो भने निशाको चितवन मेडिकल कलेजमा उपचारको क्रममा बिहान १०ः५५ बजे मृत्यु भएको प्रवक्ता अधिकारीले जानकारी दिनुभयो।

यस्तै दुर्घटनामा निशाको माइतीतर्फको आमा राप्ती नगरपालिका–३ की धिरमाया वलीको अवस्था गम्भीर रहेको र भ्यान चालक गल्छी–१ का राजकुमार ढुंगानाको अवस्था मध्यम रहेको प्रहरीले जनाएको छ ।