ज्वालामुखी गाउँपालिको हिउँदे अधिबेशन सम्पन्न, बिभिन्न ऐन कानुनहरु संसोधन सहित पास

धादिङबेशी । ज्वालामुखी गाउँपालिकाको चालु आ.व. २०८१/०८२ को गाउँसभाको चौधौ हिउदे अधिबेशन सम्पन्न भएको छ । मंगलबार गाउँपालिकाले वडा न ४ को कार्यालयमा बिभिन्न ऐन कानुनहरु संसोधन सहित पास गर्दै हिउँदे गाउँसभा सम्पन्न गरेको हो ।

हिउँदे अधिबेशनले विद्यमान सहकारी ऐनका केहि बुँदा र दुइपाङग्रे सवारी साधन मार्फत विक्रि गरिने खाद्यवस्तुमा लगाउँदै आएको करको दर संशोधन लगाएतका बिषयहरु सर्वसहमत पास गरेको छ ।

गाउँपालिकाले हिउँदे गाउँसभाको अवसर पारेर धादिङका चार जना पत्रकारहरुलाई सम्मान समेत गरेको छ । ज्वालामुखी गाउँपालिकाबाट प्रवाह भैरहेको सेवालाई जनस्तर सम्म पु¥याउन महत्वपुर्ण भुमिका खेलेको भन्दै पत्रकारहरुलाई सम्मान गरेको हो । सम्मानित हुने पत्रकारहरुमा गोरखापत्र दैनिकका धादिङ समाचारदाता डा. मुरारी अधिकारी, कान्तिपुर टेलिभिजनका वरिष्ठ उप–सम्पादक पोषनाथ अधिकारी, रेडियो धादिङका स्टेशन मेनेजर राजाराम शर्मा, र नीलकण्ठ एफ.एम.का अध्यक्ष एव पत्रकार बद्री अधिकारी रहेका छन् ।

गाउँ सभालाई सम्बोधनको क्रममा गाउँपालिकाका अध्यक्ष यामनाथ दनैले विकास निर्माणमा जनताको आवश्यकता र अपेक्षा धेरै भएको तर श्रोत साधनको कमीले सबै पूरा गर्न अप्ठेरो हुँदा हुँदै पनि आफु जनताको आवश्यकता पुरा गर्न अहोरात्र लागिपरेको बताउनु भयो । उहाँले साँधभञ्ज्याङ–डुँडेभञ्ज्याङ सडक कालापत्रेको लागि यहि वर्ष काम सुरु हुने, युवाहरुलाई रोजगारीसंग जोड्ने कार्यक्रम ल्याउने, राजनीतिक प्रभावमा योजना छनोट नभई प्राथमिकताका आधारमा योजना छनोट गरिने कुरामा आफु प्रतिवद्ध रहि सोहि अनुसार कार्य सम्पादन गर्दै आएको बताउनु भयो ।

ज्वालामुखी गाउँपालिकाले हिउँदे गाउँसभाकै दिन पारेर एक कार्यक्रम बिच पालिका तथा वडाको प्रशासनिक भवन बनाउन सहयोग गर्ने जग्गादाता तथा जग्गा ब्यवस्थापन समितिलाई समेत सम्मान गरेको छ । वडा तर्फ १, ३,र ६ को वडा कार्यालयका लागी जग्गादान गर्ने ३ जना, पालिकाको प्रशासनिक भवन बनाउन जग्गादान गर्ने ३० जना र जग्गा ब्यवस्थापन समितिकाका सदस्यहरु १० जना गरि ४३ जनालाई सम्मान गरिएको हो ।

जग्गादाताहरुलाई गाउँपालिकाका अध्यक्ष यामनाथ दनै, उपाध्यक्ष धर्म बहादुर अर्याल र प्रमुख प्रशाशकीय अधिकृत नन्दु बहादुर खड्का लगाएत उपस्थित अतिथिहरुले सम्मान पत्र,माला र दोसल्ला ओडाएर सम्मान गर्नु भएको थियो ।