धादिङमा डेंगी रोग नियन्त्रण तथा रोकथाम सम्बन्धी अभिमुखीकरण

धादिङ,०८ कात्तिक ।
डेंगी रोगको नियन्त्रण र रोकथामका लागि धादिङ जिल्लाको बेनीघाट रोराङ र गजुरी गाउँपालिकामा अभिमुखीकरण कार्यक्रम सम्पन्न गरिएको छ । बिहीबार गजुरीको मलेखु टिचिङ हस्पिटलमा डेंङ्गु रोकथाम, नियन्त्रणका साथै लामखुट्टेको लार्भा खोज र नष्टगर अभियान सम्पन्न गरिएको हो ।

कार्यक्रममा डेंगीको कारण, लक्षण, रोकथामका उपायहरू, र समुदायस्तरमा रोग फैलिन नदिन अपनाउनुपर्ने व्यवहारिक कदमहरूबारे प्रशिक्षण गराइएको जनस्वास्थ्य कार्यलय धादिङका जनस्वास्थ्य निरीक्षक तोयानाथ छत्कुलीले जानकारी दिनुभयो ।

उहाँले डेंगीको प्रमुख कारण लामखुट्टे टोकाइ रहेको बताउँदै सफाइ अभियानलाई निरन्तरता दिनु आवश्यक रहेकोमा जोड दिनुभयो । साथै, लामखुट्टले फुल पार्ने स्थानहरू जस्तै जमेको पानी हटाउने, झुल प्रयोग गर्ने, र व्यक्तिगत सावधानीहरू अपनाउनको लागि सुझाव दिएको छत्कुलीले बताउनुभयो ।

त्यसैगरी गाउँपालिकाका जनप्रीतनिधिहरुले डेंगीको बढ्दो प्रकोपलाई नियन्त्रण गर्न समुदायस्तरमा स्वास्थ्य सचेतना फैलाउने र नियमित रूपमा सफाइ अभियान सञ्चालन गर्ने प्रतिबद्धता समेत व्यक्त गरेका छन् ।

अभिमुखीकरण कार्यक्रमले समुदायमा डेंगी रोकथामको बारेमा नयाँ ज्ञान र चेतना फैलाउने विश्वास गरिएको जनस्वास्थ्य कार्याल्य धादिङले जनाएको छ। स्थानीय स्वास्थ्य संस्था र पालिकाका जनप्रतिनिधिहरूको सहकार्यमा आयोजना गरिएको कार्यक्रममा गाउँपालिकाका स्वास्थ्यकर्मी, महिला स्वास्थ्य स्वयंसेविका, विद्यालयका शिक्षक, र स्थानीय समुदायको सहभागीता रहेको थियो ।

जनस्वास्थ्य कार्यालय धादिङका अनुसार डेंगु संक्रमण रोकथाम बारे इलाका प्रहरी कार्यलय गजुरीमा पनि सुरक्षाकर्मीहरुसँग छलफल कार्यक्रम गरिएको छ ।