नेपाली कांग्रेस धादिङद्धारा विद्यार्थीहरुलाई खाद्यान्न तथा झोला वितरण

धादिङ,२४ भाद्र ।
नेपाली कांग्रेस जिल्ला कार्यसमिति धादिङले स्वाबलम्बी बहिरा आधारभुत विद्यालयका विद्यार्थीहरुलाई खाद्यान्न तथा झोला वितरण गरेको छ । कांग्रेस धादिङले जननायक बिपी कोइरालाको १११ औँ जन्मजयन्ती अवसरमा नीलकण्ठ नगरपालिका वडा नं ८ मा रहेको उक्त विद्यालयका विद्यार्थीहरुलाई खाद्यान्न तथा स्कुल झोला वितरण गरेको हो ।

सोमबार एक कार्यक्रमका बिच नेपाली काँग्रेस धादिङका सभापति तथा कृषि मन्त्री रामनाथ अधिकारीले १० बोरा चामल, २ कार्टुन खाने तेल लगायतका खाद्य सामाग्री र ४३ जना विद्यार्थीहरुलाई झोला र खाद्यान्न वितरण गर्नुभएको हो । अधिकारीले उक्त विद्यालयमा रहेका ४३ जना बहिरा विद्यार्थीको उज्जवल भविश्यको शुभकामना व्यक्त गर्नुभयो ।

कार्यक्रममा बागमति प्रदेश सांसद गोबिन्द लम्साल, गंगाजमुना गाउँपालिका अध्यक्ष भक्त बहादुर लामा, खनियाबास गाउँपालिका अध्यक्ष रणबहादुर तामाङ, त्रिपुरासुन्दरी गाउँपालिका अध्यक्ष राजु उप्रेती र ज्वालामूखी गाउँपालिका अध्यक्ष यमनाथ दनैले स्वाबलम्बी बहिरा आधारभुत विद्यालयलाई ५०÷५० हजार रकम उपलब्ध गराउने घोषणा गर्नुभएको छ ।

बिपि जयन्तीको अवसरमा ज्वालामूखी गाउँपालिकाले विद्यार्थीहरुलाई आवस्यक सामाग्री उपलब्ध गराउने र अन्य गाउँपालिकाले नगद उपलब्ध गराउने सामुहिक प्रतिवद्धता जनाउनुभएको छ ।

नेपाली कांग्रेस धादिङले पार्टी कार्यालयमा नियमति रुपमा प्रवचन कार्यक्रम गर्दै आएकोमा यस वर्ष भने बहिरा बालबालिकाहरुलाइ सहयोग गरेर फरक किसिमको कार्यक्रम गरेको हो ।