धादिङमा विश्व प्राथमिक उपचार दिवसको अवसरमा विद्यालय स्तरीय तालिम

धादिङ । धादिङ सहित शनिबार देशभर विश्व प्राथमिक उपचार दिवस मनाईएको छ । प्राथमिक उपचारको महत्वका विषयमा समुदायमा चेतना अभिवृद्धि गर्ने र प्राथमिक उपचार गर्ने स्वयंसेवकहरूलाई सम्मान गरी उत्प्रेरणा बढाउने उद्देश्यले हरेक वर्ष सेप्टेम्बर महिनाको दोस्रो शनिबार विश्व प्राथमिक उपचार दिवस मनाइन्छ ।

हालसम्म मुलुकभर एक हजार दुई सय पचास जना प्राथमिक उपचार प्रशिक्षक र तिस हजार जना प्राथमिक उपचार स्वयंसेवकहरू विकास गरी सेवा प्रदान गरिएकोे नेपाल रेडक्रस सोसाइटीले जनाएको छ । नेपाल रेडक्रसले आफ्नो स्थापनाकालदेखि नै प्राथमिक उपचार सेवालाई प्राथमिकतामा राखेर कार्य अघि बढाइरहेको छ ।

विश्व प्राथमिक उपचार दिवसको अवसरमा धादिङमा विद्यालय स्तरिय प्राथमिक उपचार तालिम सम्पन्न भएको छ । नेपाल रेडक्रस सोसाईटी युवा रेडक्रस सर्कल त्रिपुरासुन्दरी माध्यामिक विद्यालय ज्वालामुखी ५ खरीको आयोजना तथा नेपाल रेडक्रस सोसाईटी धादिङ शाखाको प्राविधिकमा सहयोगमा उक्त तालिम सम्पन्न भएको हो । शुक्रबार देखि संचालन भएको तालिममा नेपाल रेडक्रस सोसाईटी धादिङ जिल्ला शाखाका प्राथमिक उपचार प्रशिक्षक कृष्ण प्रसाद अधिकारी र लक्ष्मी शाहले सहजीकरण गर्नु भएको थियो । तालिममा २४ जना विद्यार्थी र ५ जना शिक्षक गरि २९ जनाको सहभागीता रहेको थियो ।

प्रविधिको युगमा प्राथमिक उपचार भन्ने मुलमन्त्रका साथ विश्वभरी रहेका स्वयमसेवकहरुलाई गोलबद्ध गर्दे एक घर एक प्राथमिक उपचार प्रशिक्षक तयार गर्ने लक्ष्यका साथ अभियान अगाडी बढाईरहेको नेपाल रेडक्रस सोसाईटी बागमती प्रदेशका सदस्य एवम् प्राथमिक उपचार प्रशिक्षक नारायण कुमार श्रेष्ठले जानकारी दिनु भयो ।