ज्वालामूखी गाउँपालिकामा आजदेखि अनलाइन राजस्व भुक्तानी सेवा संचालन

धादिङ,१७ भाद्र ।
ज्वालामूखी गाउपालिकामा आजदेखी अनलाइन राजस्व भुक्तानी सेवा संचालनमा आएको छ । आईतबार ज्वालामूखी गाउँपालिकाका अध्यक्ष यामनाथ दनैले अनलाइन राजस्व भुक्तानी सेवाको शुभारम्भ गर्नुभएको हो ।

गाउँपालिकाको सेवा प्रवाहलाई प्रविधिमैत्री बनाउने अभियान अन्तर्गत पालिकाले आईतबारबाट अनलाइन राजस्व भुक्तानीको सुरूवात गरेको अध्यक्ष दनैले बताउनुभयो । प्रविधिको प्रयोगले समग्र कार्यसम्पादन र सेवा प्रवाहमा सुधार ल्याउने भएकाले प्रविधिलाई आत्मसात गर्दै अगाडि बढेको उहाँले बताउनु भयो ।

सेवाग्राहीले अब गाउँपालिकाको “करदाता पोर्टल“ खोलेर आफ्नो विवरण एवं करको अभिलेख हेर्न र भुक्तानी गर्न सक्ने छन् । हाल इ–सेवा र खल्तीवाट राजस्व भुक्तानी गर्न सकिने व्यवस्था मिलाइएको गाउँपालिकाका सूचना प्रविधि अधिकृत केदार ईटनीले जानकारी दिनु भयो ।

गाउँपालिकाको वेवसाईट www.jwalamukhimun.gov.np मा गई करदाता पोर्टल खोली आफ्नो करदाता संङ्केत नं. राखेर रजिष्टर गरि सिधै भुक्तानी गर्न सकिने अधिकृत ईटनीले जानकारी गराउनु भएको छ ।

गाउपालिकामा हालसम्म यसअघि कार्यालयमै पुगेर कर तिरेका ९ हजार भन्दा बढी करदाता प्रणालीमा आबद्ध भइसकेका छन् ।