बालक्लव द्धारा पन्चकन्या माविका विपन्न बिद्यार्थीहरुलाई सहयोग

धादिङ । पञ्चकन्या मावि बेनिघाट ६ स्यादुलमा गठित बालक्लवले सोहि बिद्यालयमा अध्ययनरत अभिभावक बिहिन,जेहन्दार र बिपन्न बालबालिकाहरुलाई सहयोग गरेको छ ।

बालक्लबमा आबद्ध रहेका बालबालिकाहरुबाट मासिक १०,२० रुपैयाँ संकलित रकम बाट १३ जना बालबालिकाहरुलाई चप्पल,७ जनालाई ४ दर्जनका दरले कापी र २ बाकस पेन्सिल र १६ जना बालबालिकाहरुलाई सरसफाइको लागि २÷२ वटा साबुन सहयोग गरिएको हो ।
कुन बालबालिकालाई बिद्यालय आउन के समस्या भएको हो भनी बाल क्लबका पदाधिकारीहरुले पहिचान गरि सोहि अनुसार आवश्यकताको आधारमा सहयोग गरिएको बालक्लबका अध्यक्ष सुजन चेपाङले बताउनु भयो ।

बालबालिकाहरुबाट शुरु भएको सहयोग कार्यक्रमले बिद्यालय नियमित नहुने बालबालिकाहरुलाई बिद्यालय सम्म पहुँच बृद्धि गर्न ठुलो योगदान पुग्ने बिद्यालय प्रधानाध्यापक कृष्ण सिलवालको भनाई छ । आगामी दिनमा बिद्यालयले पनि बालक्लबले गरेका यस्ता रचनात्मक काममा सहकार्य गर्ने बालक्लब सहयोगी शिक्षक शेर बहादुर भट्टले बताउनु भयो ।