कृषकहरुलाई फलफुल खेती सम्बन्धी तालिम दिदै ज्वालामुखी गाउँपालिका

धादिङ,१० बैशाख ।
ज्वालामुखी गाउँपालिकामा फलफुल खेती गर्ने कृषक समुह/र्फमहरुका लागि संचालित फलफुल खेती सम्बन्धि सीप विकास तालिम सम्पन्न भएको छ । ज्वालामुखी गाउँपालिकाको आयोजना तथा मुख्यमन्त्री तथा मन्त्रिपरिषद कार्यालय बागमती प्रदेश हेटौडाको सहयोगमा सन्चालन भएको तालिम शनिबार सम्पन्न भएको हो ।

तालिममा वडा नम्बर १, २, ३, ४ र ७ का कृषकहरुलाई एक समुह र ५ र ६ नम्बर वडाका कृषहरुलाई अर्को एक समुह बनाई तालिम संचालन गरिएको हो ।तालिममा फलफुल बिरुवामा लाग्ने रोग किरा नियन्त्रण, बिरुवाको काँट छाँट, बोर्डो पेस्ट र मिक्स गर्ने, कलमी, नर्सरी लगायतका विषयमा कृषकहरुलई तालिम दिइएको गाउँपालिकाका कृषि विकास शाखा प्रमुख नविन बुढाथोकीले जानकारी दिनुभयो ।

७ वटै वडाका ७५ जना कृषकहरुकोे सहभागिता रहेको तालिमको राष्ट्रिय फलफुल विकास केन्द्रका वरिष्ठ बागवानी विकास अधिकृत विष्णु प्रसाद गिरीले प्रशिक्षण दिनुभएको थियो ।गाउँपालिकाका उपाध्यक्ष धर्म बहादुर अर्यालको अध्यक्षतामा सम्पन्न भएको तालिममा गाउँ पालिकाका प्रमुख प्रशासकिय अधिकृत सुमन पण्डितको प्रमुख आतिथ्य रहेको थियो भने राष्ट्रिय फलफुल विकास केन्द्रका वरिष्ठ बागवानी विकास अधिकृत विष्णु प्रसाद गिरीको विशेष आतिथ्य रहेको थियो ।