डेंगु रोग नियन्त्रण तथा न्युनीकरणको लागि सरोकारवाला निकायसँग सचेतना कार्यक्रम सम्पन्न

धादिङ,५ बैशाख
धादिङको नीलकण्ठ नगरपालिकाको आयोजनामा मंगलबार डेंगु रोग नियन्त्रण तथा न्युनीकरणको लागि सरोकारवाला निकायसँग सचेतना कार्यक्रम सम्पन्न भएको छ । नीलकण्ठ नगरपालिकाको कार्य बाहक मेयर दिपक विश्वकर्माको अध्यक्षतामा पालिका स्तरीय खोप समन्वय समितिको बैठक बसी डेंगु रोग नियन्त्रण तथा न्युनीकरण,कोभिड १९ विरुद्ध बुष्टर खोप अभियान तथा पुर्ण खोप सुनिश्चितता र दिगोपनाको विषयमा अन्तरक्रिया कार्यक्रम सम्पन्न भएको हो ।

कार्यक्रममा स्वास्थ्य कार्यालय धादिङका बरिष्ठ जनस्वास्थ्य प्रशासक सागर प्रसाद घिमिरेले कोभिड १९ विरुद्ध बुष्टर खोप अभियान तथा पुर्ण खोप सुनिश्चितता र दिगोपनाको विषयमा सहभागीहरुलाई जानकारी गराउनु भएको थियो ।यसैगरी धादिङ अस्पतालका मेडिकल सुपरिटेन्डेन रुद्रमणी भण्डारीले डेंगु रोग के हो ?यसको नियन्त्रण तथा न्युनीकरणको लागि गर्न सकिने कार्यहरु,यसको लक्षण,बच्ने तरिका,खतराका लक्षणहरुको विषयमा जानकारी गराउनु भएको थियो ।

यसैगरी नीलकण्ठ नगरपालिकाका बरिष्ठ जनस्वास्थ्य अधिकृत विष्णु प्रसाद रिजालले नगरपालिका भित्र अहिले सम्म खोप लगाएकाहरुको तथ्यांक,डेंगु संक्रमणको अवस्था र पुर्ण खोप सुनिश्चितताको लागि नगरपालिकाले गरीरहेको कामको बारेमा जानकारी गराउनु भएको थियो । नीलकण्ठ नगरपालिकाका जनस्वास्थ्य अधिकृत शिव रानाले सन्चालन गर्नुभएको कार्यक्रममा वडा अध्यक्षहरु,कार्यपालिका सदस्यहरु लगायत सरोकारवाला निकायहरुको उपस्थिती रहेको थियो ।