पत्रकारहरुको हक अधिकारको लागि प्रदेश सरकारले सहयोग गर्छ : मुख्यमन्त्री जम्मकट्टेल

धादिङ,२५ चैत
बागमती प्रदेशका क्रियाशिल पत्रकारहरुलाई सामाजिक सुरक्षा कार्यक्रममा आवद्ध गराउनको लागि ५० लाख सहयोग गर्ने मुख्यमन्त्री शालिकराम जम्कट्टेलले बताउनु भएको छ ।जनताको सेवामा अनवरत खटिने पत्रकारहरुको हक अधिकारको लागि क्रियाशिल पत्रकारहरुलाई सामाजिक सुरक्षा कार्यक्रममा आवद्ध गराउनको लागि आफुले पहल गर्ने बताउनु भएको हो ।

नेपाल पत्रकार महासंघ,जिल्ला शाखा धादिङको २३ औँ साधारणसभा तथा पुरस्कार अर्पण कार्यक्रमको प्रमुख अतिथी समेत रहनुभएका मुख्यमन्त्री जम्मकट्टेलले सो कुरा बताउनु भएको हो । कार्यक्रमका प्रमुख अतिथी समेत रहनुभएको मुख्यमन्त्री जम्कट्टेलले पत्रकार महासंघले सन्चालन गर्न लागेको सन्चार ग्राम निर्माणको लागि आफुले आजैबाट पहल थाल्ने पनि बताउनु भएको छ । आफु आन्तरिक मामिला तथा कानुनमन्त्री हुँदानै बजेट बिनियोजन गरेको भन्दै उहाँले डिपिआर भईसकेको भवन निर्माणको लागि आफु अब फिल्डमै गएर प्रक्रिया अघि बढाउने प्रतिबद्धता व्यक्त गर्नुभएको हो ।

पत्रकार कल्याणकारी कोषमा २० लाख रुपैँया जम्मा भईसकेको भन्दै उहाँले प्रक्रियागत रुपमा केहि ढिला भएको भन्दै अब छिट्टैनै त्यसलाई पनि कार्यन्वयनमा ल्याउने बताउनुभयो। कार्यक्रमका विशेष अतिथी नगरपालिका संघका केन्द्रिय अध्यक्ष तथा नीलकण्ठ नगरपालिकाका मेयर भीम प्रसाद ढुंगानाले पत्रकारहरुको क्षमता अभिबृद्धी गर्नको लागि नगरपालिकाले सक्दो सहयोग गर्ने बताउनुभयो। स्थानीय तहहरु पत्रकारसँग हातेमालो गरेर अघि बढ्न तयार रहेको भन्दै मेयर ढुंगानाले राम्रो भए राम्रो र नराम्रो भए नराम्रो नै भयो भनेर समाचार लेख्नको लागि आग्रह गर्नुभयो।

बिगतमा पनि आफुले पत्रकारको हक अधिकारको लागि सहयोग गरेको भन्दै ढुंगानाले आगामी दिनमा पनि सहयोग गर्ने प्रतिबद्धता व्यक्त गर्नुभएको थियो । नेपाल पत्रकार महासंघ जिल्ला शाखाका सभापति राजाराम शर्माको अध्यक्षतामा सम्पन्न भएको कार्यक्रममा मुख्यमन्त्री शालिकराम जम्कट्टेलको प्रमुख आतिथ्यता रहेको थियो । कार्यक्रममा नीलकण्ठ नगरपालिकाका मेयर भीम प्रसाद ढुंगानाको विशेष आतिथ्यता रहेको कार्यक्रममा प्रमुख जिल्ला अधिकारी रमेश ढकाल,प्रहरी प्रमुख गौतम मिश्र लगायतको आतिथ्यता रहेको थियो ।कार्यक्रममा विभिन्न विधाबाट जिल्ला क्रियाशिल पत्रकाहरुलाई पुरस्कृत गरिएको थियो ।

सिताराम प्रसाद बर्मा स्वास्थ्य पत्रकारिता पुरस्कारबाट डा. मुरारी अधिकारी,सिताराम प्रसाद बर्मा स्वास्थ्य पत्रकारिता पुरस्कारबाट नवराज छत्कुली,राजेन्द्र प्रताप शाह पुरस्कारबाट शिब सिलवाल, विकास पत्रकारीता पुरस्कारबाट नारायण प्रसाद सिलवाल, विकास पत्रकारीता पुरस्कारबाट उपेन्द्र अधिकारी, शालिकराम बर्मा पत्रकारिता पुरस्कारबाट गोमा थापा र शालिकराम बर्मा पत्रकारिताबाट शिवराज आर्चाय पुरस्कृत हुनुभएको छ।