माघे संक्रान्तिमा धुवाँकोटमा १७ हल गोरु जुधाईने

धादिङ,२८ पुस ।
माघे संक्रान्तिको दिन धादिङको नीलकण्ठ नगरपालिका वडा नम्बर १४ धुवाँकोटमा १७ हल गोरु जुधाईने भएको छ।संस्कृति संरक्षण तथा पर्यटन प्रवद्र्धन केन्द्र र भंगेरी युवा क्लबको आयोजनामा धुवाँकोटको भंगेरीमा गोरु जुधाई कार्यक्रमको आयोजना गरीएको आयोजकले जनाएको छ।

धुवाँकोटमा पर्यटन प्रवद्र्धन तथा स्थानीय उत्पादनको प्रवद्र्धनमा समेत सहयोग पुग्ने गरी विगतमा भन्दा झनै प्रभावकारी रुपमा गोरू जुधाई कार्यक्रम आयोजना गरिन लागिएको आयोजक संस्कृति संरक्षण तथा पर्यटन प्रवद्र्धन केन्द्रका अध्यक्ष शिवकुमार श्रेष्ठले बताउनुभयो।माघे संक्रातिको दिन गोरु जुधाई र कृषि मेला तथा हस्तकलाका सामाग्री प्रदशनी हुने भएकोे छ।

विभिन्न ४ समुह बनाई १७ हल गोरु जुधाईने श्रेष्ठले जानकारी दिनुभयो।जसमा पहिलो समुहको विजेता र उप विजेता गोरुधनीले क्रमस १२ हजार र १० हजार दोस्रो समुहको विजेता र उप विजेता गोरु धनीले क्रमस १० हजार र ८ हजार, तेस्रो विजेता र उप विजेता गोरुधनीले क्रमस ८ हजार र ६ हजार चौथो समुहको विजेता र उप विजेता गोरुधनीले क्रमस ४ हजार र २ हजार पाउने छन्।यस्तै आयोजकले प्रति गोरु १० केजी चामल र १ लिटर तेल गोरुधनीलाई प्रदान गरिने जनाएको छ । कृषि मेला तथा हस्तकलाका सामाग्री पर्दशनीमा सहभागीहरुलाई प्रति स्टल १ हजार प्रदान गर्ने जनाएको छ।