ज्वालामुखीको काउले डाँडा र गैरी गाउँलाई नमुना,स्वच्छ र सफा गाउँ घोषणा

धादिङ । ज्वालामुखी गाउपालिका वडा न ६ स्थित काउलेडाँडा, गैरी गाउँ टोललाई नमुना,सफा र स्वच्छ गाउँ घोषणा गरिएको छ । बुधबार एक कार्यक्रमको आयोजना गरि काउले डाँडा र गैरी गाउँलाई नमुना,सफा र स्वच्छ गाउँ घोषणा गरिएको हो । ज्वालामुखी गाउपालिका वडा न ६ काउलेडाँडा, गैरीगाउँ टोल बिकास समितिको आयोजना तथा ज्वालामुखी गाउपालिका र शान्ति नेपालको सहयोगमा कार्यक्रम सम्पन्न भएको हो ।

कार्यक्रमलाई सम्बोधन गर्दै प्रमुख अतिथि संघिय सांसद रामनाथ अधिकारीले व्यक्ति,घर,टोल बाट गाउँ सफा हुने भन्दै सरसफाईले हाम्रो स्वास्थ्य र व्यक्तित्वको पहिचान झल्किने बताउनु भएको छ । उहाँले पालिका अध्यक्ष यामनाथ दनैले लिएको लक्ष पुरा गर्न चासोको साथ हातेमालो गरिदिनुभएकोमा सरोकारवालाहरुलाई धन्यावाद समेत ब्यक्त गनुभएको थियो । सांसद अधिकारीले गाउँको सफा राख्ने दायित्व समुदायको हरेक नागरिकको रहेको भन्दै स्वास्थ्य गाउँ कायम राख्न आवश्यक पर्ने पूर्वाधार विकासमा आफूले सहयोग गर्ने प्रतिवद्धता समेत ब्यक्त गर्नु भएको छ । कार्यक्रममा सम्बोधन गर्दै स्वतन्त्र पार्टी बाट प्रतिनिधि सभाका सांसद बन्नुभएका डिपि अर्यालले नमुना,स्वच्छ र सफा गाउँ घोषणाले उक्त स्थानका नागरिकहरुको चेतनास्तर माथिल्लो छ भन्ने संकेत गर्ने बताउनु भएको छ ।

नमुना,स्वच्छ र सफा गाउँ घोषणा कार्यक्रमलाई सम्बोधन गर्दै गाउँपालिका अध्यक्ष यमनाथ दनैले पालिका भित्रका सबै गाउँलाई नमुना सफा र स्वच्छ गाउँ घोषणा सहितको कार्यन्वयन गर्ने कार्यमा आफु लागिरहेको बताउनु भएको छ । उहाँले नमुना पालिका बनाउने रहरलाई साकार पार्न प्रतिवद्ध भएर आफु लागीरहेको समेत बताउनु भएको छ । नमुना,स्वच्छ र सफा गाउँ घोषणा गरिएको काउले डाँडा र गैरी गाउँमा हाल १ सय ७५ घरधुरी रहेको छ ।