भैरवी साकोस र हिमाल साकोस बीच एकीकरण कार्य सुरु

धादिङ,०८ असोज ।

धादिङको नीलकण्ठ नगरपालिका वडा नं ३ रहेको भैरवी साकोष र हिमाल साकोष एक आपसमा एकीकरणका लागि सैद्धान्तिक रुपमा तयार भएका छन् । नेपालमा अर्थतन्त्र कमजोर बन्दै गएको र वैंक तथा वित्तीय संस्थाहरुले मनोमानी गरिरहेको वर्तमान परिवेशमा सहकारी संस्थामा आवद्ध शेयर सदस्यहरुको माग अनुसार सेवा प्रदान गर्न सवल र सक्षम संस्था वनाउनु पर्ने आवश्यक ठानी शनिबार दुवै संस्थाका संचालकहरुको सयुक्त बैठक बसी एकीकरणको कार्य शुभारम्भ गरेका हुन् ।

गुणस्तरीय र परिणाम मुखि सदस्य सेवाका लागि विश्वासनीय, भरपर्दो, सवल र सक्षम संस्था वनाउन, संस्थागत दिगो विकास तथा सदस्य केन्द्रित सेवा सहितको मुनाफा प्रदान गर्न, संचालन खर्चलाई कमी गरी आयमा बृद्धि गर्ने उद्देश्यले दुई सहकारी एकीकरण गर्ने कार्यको थालनी गरिएको बताइएको छ ।

शनिबार बसेको दुई संस्थाको उपलव्ध संचालक तथा सदस्यहरुको संयुक्त बैठकले नेपाल सरकार सहकारी विभागको निर्देशिका र कार्यविधी बमोजिम एकीकरणका लागी प्रारम्भिक प्रकृया अगाडी बढाउन गणेशकुमार श्रेष्ठको संयोजकत्वमा शान्तविक्रम वानियाँ, कृष्णप्रसाद लम्साल, विनोद कुमार श्रेष्ठ र राजकुमार श्रेष्ठ रहेको पाँच सदस्यीय कार्यदल गठन गरिएको छ। कार्यदललाई सहकारी एकीकरणका लागि गर्नुपर्ने सवै कार्यहरु प्रकृयागत रुपमा अगाडी बढाउन सक्ने जिम्मेवारी समेत संयुक्त बैठकले दिईएको बताइएको छ ।

सहकारी एकीकरणको लागि विभागबाट स्वीकृति लिनको लागि दुवै संस्थाको संयुक्त वैठक वसी कार्यदल वनाउनु पर्ने, कार्यदलले एकीकरण कार्यबिधी वनाइ दुईवटै संस्थाको साधारण सभाबाट पारित गर्नुपर्ने जस्ता नीतिगत कुराहरु पुराभएपछि मात्र एकीकरण प्रयासका लागि सहकारी विभागमा लैजानु पर्ने प्रावधान रहेको छ भने एकिकरण स्वीकृति पछि मात्र दुई साकोसको अवस्थाको बारेमा विज्ञहरुलाई सहजीकरणमा राख्न सकिने भएकोले जतिसक्दो छिटो प्रक्रिया थाल्न कार्यदललाई निर्देशन समेत बैठकले गरेको छ ।

दुई साकोस एकीकरण पछि संस्थाको नाम धादिङ एकीकृत वचत तथा ऋण सहकारी संस्था लि रहने समेत प्रस्ताव भएको छ । त्यसैगरी संस्थाको कार्यालय धादिङवेंसी विचबजार स्थित भैरवी सदनमा हुने बताईएको छ । अव बन्ने संचालक समितिमा अध्यक्ष १, उपाध्यक्ष २, महासचिव १, कोषाध्यक्ष १, सचिव २ र सदस्यहरु ८ जना गरि १५ सदस्यीय संचालक समिति बनाउने समेत छलफल भएको स्रोतले बताएको छ।

सहकारी एकीकरणका लागि यो दोस्रो पटक प्रयास गरिएको हो । २०७५ सालमा भैरवी, हिमाल, श्रोत परिचालन र अग्रणी साकोस बीच एकीकरणका लागि प्रयास हुँदा एकीकरण पछि संस्थाको नामाकरण, नेतृत्व र कार्यालयको विषयमा निर्णय हुन नसक्दा सफल हुनसकेको थिएन । यी दुवै सहकारी संस्था २०५७ सालमा एकै साथ स्थापना भएका हुन् ।